Rue de Marseille , نهج مارسيليا

من وراء الزّمن 
ظهر حسن
بطاّل و ناوي على خبزة
حكايات من ورا العذاب تِتْقرا
يشوف في النّاس حفايا
و تغزر لرواحها في المرايا
يبدا يسأل في روحو
منين ، منين، منين و لوين
الفقر بعدّو علينا
يزّينا  ما عانينا
كلّ يوم يصول و يجول
نهج مرسيليا
الكلام هرب بينا
الوجايع نسّاونا إمّالينا
و أنا نخمّم نمشي 
و خايف لا نرجع
نخمّم نمشي و يهزّني البابور معاه
في دوّامة
في بلاّعة ماكلتني وتخلّي أمّي حايرة
هارب
هارب من الوجايع 
إلّي معادش عندها بقايع
هارب لبلاد العكري
إلّي ما عندها لا إطّحي و لا تزّكي
هارب من الحقرة 
إلّي بالنّاس ترجع
نخاف نمشي ما نرجع
نخاف نمشي 
ونخلّي إلّي شواتلي الكبيدة
تستنّا في الفلوكة هكّاكة
إبتسام نور الأحلام
سارفوز في  مونتاكريستو
يا بوقلب أنستو
حكاتلي على المنسيّات
إلّي ولاّت عثرات
و زادتني آهات
نهج مارسيليا كانت  بلاصتنا
كلّ يوم نتقابلو قدّام لاماما بدمعتنا
هي تخدم و أنا نلوّج
من ورا البلاّر بالها محتار
عمري ما قلتلها ماشي للطليان
نحبّها و ما نحبّ نسلّم فيها
نحبّها و عمري ما نجّمت نحكيلها
خايف لانمشي ما نرجع
خايف لا الدّنيا تسطع
فدّيت من وقفة الحيوط
و أنا يدّي على قلبي لا نموت
في ليلة و نهار
لمّت لمّيمة 
باعت الذّهبات
مسحت دمعاتها
 غادي وين بقات
و قلبها ما قايللها خير
و حسن ديما يتمنّى يطير
مشا ما ولّى 
في الخلا ما خلاّ
كان ميساج
في برطابل الأحباب
راني ماشي
بعثو و هو في الفلوكة
و يحلم بمستقبل بفلوسه
مشا
و إبتسام قهرتها الأيّام
مشا
و خلاّها عايشة في الأوهام
مشا
لين دخلت و خرجت في الحلّة
بايتة سارفوز و تصبح سارفوز 
في مونتاكريستو ،نهج مرسيليا 
لا عاد تتكلّم
و قتلك حبّي فيه ما نسلّم
هذا إلّي حلم بوطن يعيّشو

لقى كان موجة إطيّشو

Révélation

الدّنيا علّمتني نبكي وحدي
نحكي مع الحيوط
فمّاش ما تحسّ بأنين الصّوت
نشوف في العباد كلّ يوم
تتمايل قدّامي
على اليمين
على اليسار
و ماشية مدنكسة و تعاني
ليوم عيد ميلادي
و أنا منفيّة
في بلاد منسيّة
لا حدّ يواسيني
و لا يحطّني في حضنو و يدّفيني
سنين عدّيتهم على هالحالة
ناري علّي جرالي
بلادي إتّخذت قدّامي
و أنا نغزر و عيني حيّة
شنيّة ذنبي
ماشين للهاوية
في رمشة عين ناوية
حليلي علينا
الماء يجري تحت ساقينا
و ماهم عالمين بينا
ناري على بلادي ولاّت زريبة
كلّ واحد ينتّش فيك و يقلّع
البرّاني داخل بطولة اللّسان
وولد البلاد خايف
و عامل على روحو حصار
نحبّ نكون فرططّو زماني
نخبّ نكون نسمة تهفهف
على البلاد الجنّة
إلّي خيالها ما تهنّا
نحبّ نكون زهرة
في ربيع فوّح بالجملة
نحبّ نكون آخر نظرة
لحبايب آخر العام و اللّحظة
نسقيك بحبّي العاصي
و في شوارع لياليك نباصي
نشرب من عينيك
و نرقد تحت ظلّ جواجيك
سمّيتك جنّة
خاطر فيك نزيد نحلا
حتّى بدينار في مكتوبي و فالسة من هوني
نهزّ راسي و نقول هاكم فلوسي
و نعنقر بيهم كبّوسي
عرفت فيك الحلّوة و المرّة
عرفت  فيك الغلطة و الجرّة
عرفت فيك المنبوز
و إلّي كشاكشو طالعة و نرفوز
عرفت فيك العاشق الولهان
في حبّها هابل و عامل مقام
عرفت فيك الهجّالة بصغارها
تخدم ، ريقها شايح و ما على بالها
عرفت فيك الفقر و الميزيرية
و البرجوازيّة إلّي خشمها و ناسينها
عرفت فيك الخّدام حزام
و إلّي بشكارة ديبلومات
 قعدّوه من البلاصة و دزّوه لتالي على البلاطة
عرفت فيك النّجاح و الفشل
و دقّان الحنّك و الطبّل
عرفت فيك النّاس إلّي بوجوهها
و لُخْرا  إلّي بقفافها موجودة بعيوبها
هازّتني الدّنيا بجناحاتها
كلّ مرّة تخلا بيّا في بلاصة بحكاياتها
موجة تهزّ و موجة تجيب
و الصّحيح ما نعرف عليه وين
على كلّ حال
ما يدوم حال و لا أحوال
بلادي صنديدة و على راسها ريشة
بلادي تتبختر بين البلدان
و تتزعبن على كلّ الجيران
بلادي في عزّ شبابها
والدنيا مازالت قدّامها
بلاد صغيرة ترنكوشة
و بش تهبل على ولاد الحومة للعنكوش
شهوة صبيّة
تحبّ تعيش في حريّة
زعمة ياخذو بخاطرها
و إلاّ تقعد تاكل في ضوافرها؟

écrit le 6-6-2011

تونس تعمّل علينا

أوّل مرّة نحسّ إلّي ما كيفنا حدّ 
أوّل  مرّة نحسّ إلّي كلّ حدّ فينا بش ينتخب إلّي يساعدو
أوّل مرّة نحسّ بروحي إلّي لازم ننتخب
كي شفت  التصاور متع الصّف جاني البكاء 
قلت حرمونا قبل حتّى بش نحكيو مع بعضنا
ليوم تونس تعمّل علينا
نخّمم في النّاس إلّي تقاسي
في البّطال
في النّاس إلّي ما عندهمش حقّ كاس حليب
فلّي عايش في الشّارع
فلّي سقف الدّار يقطر عليهم
فلّي مازالو لا عندهم لا ماء لا ضوء
فلّي يخدمو نهار و  10لا 
فلّي ماتو على خاطرنا و إلّي مازالو جرحى على خاطرنا
فلّي غلات عليه الدّنيا و ما خلط على حتّى قدمة
فلّي ضيّع قرايتو بش يتكلّم على حقّو
فلّي تعذّبو و هو مشدود و مقهور
نخّمم فلّي يطلعو معايا في المترو والكار
تونس تعمّل علينا
تونس تعمّل علينا
خلّينا نحقّقو حلمتنا بيدينا

يا هواء

• مخنوق و نحبّ نصيح
  هواك غمّ عليّا
  قصّ جوانجي
  ما عاد طارو بيّا
  هدّلي فمّي
  هاج عليّا
  تغرّيت و طحت في ماهيّة
  يا هواء خرّجني من همّي
  عفّ عليّا
  سرّحلي صوتي
  و سيّب فنّي و عينيّا
  خلّيني نكتب
  هاذاكا شِبْقا ليّا
  ما عندي كان كلامي يأمّن بيّا

Comming Soon

Lettre à Papa décédé un 2 octobre 1992

ce soir je rends hommage à mon Papa , Dr Ben Saad décédé un 2octobre 1992.

Mon reve était de le voir , d'écouter sa voix , de le remercier de tout ce qu'il m'a transmit . je reve toujours d'un moment privilégié avec lui, parler de tout et de rien , boire ce fameux café  qu'on aime tant tous les deux , écouter du malouf , papoter ainsi va la vie.

je reste toujours figée devant sa photo que j'ai dans ma chambre et je lui parle souvent discrétement , je lui parle de mes peines , des secrets que je ne peux raconter en publique.

c'est drole mais je ressens parfois sa présence , je ressens son ame qui veille sur moi.

19ans sans lui c'est une peine quotidienne , une souffrance qui ne m'a jamais quitté meme si ça ne parait pas .

en fait , c'est un sentiment ambigu qui me laisse souvent dans les nuages , errant dans mes pensées , imaginer ainsi  ce que ma vie aurait pu etre.

Maman me parle chaque jour de lui , ce qu'il aimait , de son caractère , de tout  et de jour en jour , je l'admire encore plus . un homme digne , un homme qui aimait la vie , un père dévoué meme s'il n'a pas vu ses deux enfants grandir .

je félicite ainsi ma mère qui a passé toute sa vie à nous éduquer , à nou faire voir la vie autrement . elle est plus qu'une mère , elle est essentiellement une amie , une confidente , une femme qui a tout fait pour nous rendre heureux .

c'est le gain de ma vie .

donc un conseil pour vous tous , si vous avez eu de la chance de connaitre vos parents , ne la gachez pas, c'est inouie , d'autres ne l'ont pas eu .

Dernier mot : papa, si tu m'entends ,sache que ta fille sera toujours à l'hauteur de ton éspèrance !

نحلم

un petit texte avant de quitter l'écriture ...

نحلم بشوارعك ضوّاية

قهاوي مشعولة و مدّفاية

نحلم بالمسرح يبرق

و النّغمات خارجة منّو عذبة تنطق

نحلم بالنّاس لبعضها تحكي

على الحاضر و المخّبي

نحلم بيكم زاهين

و في الحبّ هايمين

نحلم بغدوة إلّي يبدا ليوم

و أنا ديما عليك نموت...

ومن الفيسبوك من عشق ، حلقة 2

أيّا عاد نكملّو الحكاية
خرجت العاشقة من دارهم
و قالت نمشي نعمل بريكة في حلق الواد
ركبت في التران 
شعيرة لعمل بيها فران
على بومزيود
على عشقة و حكايات
و على بيّاع موشوار و شوينقومات
كلّ قدير و قدرو
و هي عاملة روحها مش هوني
أخطى راسي لا تضربوني 
برا يا درج إيجا يا درج ..وصلت للمحطّة
شكون تلقا؟
جميل و بثينة الفيسبوك
أي يا وخيّاني قهروني 
بربّي لا تلوموني 
و لا تعملو برّاح هوني
هوما زويّز من نفس الحومة


و مدّخلين فينا غولة
قالّك حبّ و عواصف
كيما غنّات بديعة
حاصيلو حبّهم للغناية تناصف..
ستدعاوني على بريكة
لا لا مرّة أخرى 
قلت في قلبي
حكاية شدّان الشّمع موش في سبرنا
يزّينا ما تهنتلنا 


                                    و للحديث بقيّة  

و من الفيسبوك من عشق؛حلقة1

هبلة 
و بين الهبلة و الهبلة دنيا عجب 
مطرة 
وبين مطرة و مطرة قلبي تعب
زوز جواجي 
يقسمو في حبّ كلب 
و يتمنّاو ليالي لين السّماء تترعد
حبّ مالي الكتب
مسكينة قدّاشي دغفة
و مازالت تحلم ...ليالي زرقة
يا طفلة راك مازلت حنينة
تي سرفق و أعطي الكلاط
فماّش ما تحسّ بالدّنيا أيّامات
صحبتنا العاشقة مازالت نوّارة
مزيانة و إلاّ قرّاية 
مشكلتها و أمورها الفيانة
فيسبوك خدّام 
و هي تلوجّ على فتى الأحلام
أوه يا ناري
قدّاشك بش تعاني
نوّصلو السّارق لباب الدّار
و نكمّلو
هي فنّانة و موش ظاهر عليها
عماوولها عينيها و قالو: بنّيتي مازلت صغيرة 
و هالفنّ موش لينا
عملت من الحبّة قبّة 
و ساعات القوادة تفيد في الضّربة
وصّاتها أمّها: يا للّة إلّي يقلّك كلمة رجّعلو جملة
الطّفلة من شان صبحت في شان
لا عاد رقيقة و لا تحبّ الطّبيعة 
شبشبت شعرها و هبطت للشّارع بقدرها
تكتب و الفنّ ماليها
كلّ مرّة حكاية تحكيها
و حدّ ما يدبّر فيها
ما نطوّلش عليكم 
في عام الطّفلة نسات الأوهام
أما ما بيناتنا مازالت تلوّج...
على فتى الأحلام 
عمشة في دار العميان ...
و ديما فيسبوك خدّام 
عايشة شويّا في الزّمان ....
                                          و للحديث بقيّة

Testament

درنا للنّاس
و النّاس تحكي علينا
حبّينا
و عشقنا و حدّ ما تلها بينا
لين صادفت الأيّام
و غمرتنا بباهيها و خابيها
خبّي
خلّي و شيء ما تورّي
ما تورّي من حالك كان إلّي يدوم
و إلّي عامل فيك نمّوس الغول
نحّيه و يزّيك منّو و تلّفو
أنا نحكي عليك و عليهم
عليك و عليها و علّي ناسيها
قبل منام عيني
نحبّ نفشّ غيضي
نخلّيلك هالبريّة
فماش ما تهدا شويّا
الموت حاضرة في كلّ وقت
و الدّنيا هاذي نواصي و عتب
حبّ و تعب
جهد و نكد
نحبّ نحكيلك يا وليدي
ما تنسا قصدي
حطّ النّاس في عينيك
و عرك ما تنسا إمّاليك
الدّنيا راهي غدّارة
و الموت فيها ديما قريب
وليدي إفهم قصدي
ياوليدي راهو عرق الجبين 
هو إلّي يخلق الملايين
ما تجري وراء الفلوس
راهي تقضي عليك
و تردّك كابوس
يا وليدي إفهمني أنا أكبر منّك
و يقولو إلّي أكبر بليلة أزيد منّك بحيلة
كول قدّ الجهيّد 
و بعمرك ما  تأيّس
يا وليدي راني نخاف عليك
و نحبّ ديما نوصّيك
نوصّيك على أمّك
هاذيكا إلّي تصونلك قدرك
و ترفع في شانك عند أهلك
هاذيكا الحنينة
و لا عمرها بش تخونك حتّى مريرة
نصوّيك على أختك
هاذيكا إلّي تهزّلك شفرك
تلقاها رفيق وقت الضّيق
و إلّي تطلبو تلبّيك
أختك في عينيك
نوصّيك على روحك
ما تخّبي جروحك و أحكي
أحكي لين تبكي
إبكي راهم الدّموع باهين و غالين
نحبّك قبل منام عيني تكون ثمرة حبّي الوحيد
و هوايا أكيد
قبل منام عيني نحبّ نزّهيك
بروحي و بقلبي نفديك
يبّعد الظّلم عليك و لا يشويك
و يجيك بلا على يديك
نصوّيك و نزيد نوصّي
راهي الدّنيا بين يديك
إنت إلّي تحبّ تعّليها
و إلاّ ترميها ترميها في حفرة و دهليز
نوصّيك و راني ديما نبغيك

Visage Perdu

ما عرفتك وأنا صغيرة

ما نسيتك وأنا كبيرة

شمسي الضوّاية

في قلبي وبدموعي البكايّة

نحسّ بيك

نرا فيك فيّا

تمنّيت

تمنَيتك تحكي معايا

نسهرو على هواء المالوف

إلّي ماكن فيّا

بقهيوة عربي نعدّيو السهريّة

ونغطصو في حكايات ما توفاش

آه هذا قدر محكوم عليّا

ما عرفتك

في سكوتي

ما حبّيت نقلّك على نوحي

أمّا نحّس بيك تحسّ بيّا

هاني نحلم 

لو جات الدّنيا هكّا 

آش بش يصير فيّا؟

Rupture avec le silence

أنا قلبي وسطو مدافع

ما رضا بيّا كان الشّارع

أنا قلبي عليك حزين

و عماه الغلّ و التّهنتيل

أنا قلبي فيك ضايع

و فمّي تكلّم و تحرّر من كلّ قيود

أنا فيك نموت

أنا عمري ما ننسا أصلي

إنت أرضي و فصلي

شارع بلادي حذاني 

خذاني و خبّاني

شارع بلادي نحلم بيه ليالي

فيه بكيت

تكلّمت

عيّيت

تعبت

تعلّمت و عمري ما سلّمت

فيه نسيت

تعاقبت 

ذلّيت

أمّا كي هبطت ما شاورت

شارع بلادي كبير

و عمو ما ضاق على حدّ

لمّ حضب

و يقول الأيّام تحكي هموم النّاس

جرح ما يبراش

جرح موالف بينا و ما ينساش

قلبي مازال معبّي

فايض و ما يحبّ يخبّي

شوكة إدقّ في كنيني

و عمرها ما تنّسيني

شارع بلادي ديما يناديني

لين الموت تفارق عيني

زوّالي

زوّالي

و في الدّنيا نعاني

زوّالي

بقلبي و روحي و أفكاري

زوّالي 

و ماني طالب شيء

زوّالي

 و ما فرحت بشيء

قالو حريّة

قلنا جرثومة بشريّة

قالو فلوس 

قلنا ملّيم ما نكسابوهوش

قالو خدمة

قلنا من الغبنة ما شبعنا

صحت

حتّى صوتي بحّ

عيّطت

حتّى ريقي نشف

تِبْقلت بالشّمس

حتّى من المرض عرفت

سنين الله و أنا زوّالي

و عامل روحي

 مرتاح في بالي

زوّالي

و حتّى في الحبّ نعاني

عرفتها في إعتصام

شواتلي الكبيدة

هبّلتني 

و عملتلي إنهيار

زوّالي 

و الغلّ ساكن فيّا

جوجمة

و السّخانة تزيد على ما بيّا

زوّالي

بطّال 

نمرمد في نفس المريول

نفس الأمور

زوّالي

و نكتب على حالي

حال ميليارات كيفي

و النّاس لا تبالي

زوّالي

 و الدّنيا غالية عليّا

ما نوصل لآخر الشهر

كان ما الدّم يوصل لراسي و عينيّا

زوّالي

إفهم يا أخي راني زوّالي

و في الدّنيا نقاسي

لا تقلّي غدوة

و لا تقلّي بعدو

ستنّيت لين عييت

ستنّيت لين فدّيت

ستنّيت لين كليت

الخزّ

البخس

و الدزّ

زوّالي و كرشي فارغة

ريحة فمّي ما تِتُوصفش

جيعان نحبّ ناكل

جيعان نحب من العين نشرب

زوّالي

 و في الحبّ نعاني

حتّى هي زوّاليّة 

و ما عندك ما تقول فيها و فيّا

حبّك لاهب قلبي

و ما ندري ع الزّمان واش مخّبي

زوّالي 

و إيلي و إيلكم ربّي

زوّالي حتّى يتِكشفْ المستور

زوّالي

و الأيّام بيناتنا

و يبّقي الخير على بلادنا

à Salma

ancien texte : un homme perd sa femme par un cancer , elle lui laisse une petite fille de 3 ans .. il raconte..

من وراء الأحزان

حكاية تعدّات

وفات

نسات

تعدّا عليها البكاء

خزّزت

تحكات بلغة عمرها ما تحكات

تِحكات بلغة بعمرها ما تحكات

غزرت للعينين

خنقت العبرة 

تشوات

نسات الأيّام 

الدّنيا ما تهان

كيف نتفكّر

هزّيتك في إيديّا لذات مكان

كنت ديما تحّب الواد

في أيّام العذاب

و صوتك يسكت بالشّويا بالشّويا 

يخفت

العينين تحكي ألف زمان

و دمّك يجري في عروقك يا لوهام

علاش يا سلمى بش تمشي و تخلّيني؟

و في كلامك تهجّيني؟

يا سلمى تتفكّر  كيف كنت نقرالك أشعار؟

تتفكّر حكايات نزار؟

و إنت تحشم و تبدا هايمة في الأفكار؟

تتفكّر بكانا طول اللّيل؟

و حبّنا ما تفّك حتّى كيف كلينا المرار؟

فراقك صعيب عليّا

ما  نجّم نشوف في ثنيّة

فراقك هزّني للهاوية

راني كلّ يوم نحكي وحدي

و شيء ما نجّمت نخّبي

تسألني تحفونتنا 

شبيك علاش دموعك حيار؟

كيفاش بش نفّسرلها يا سلمى؟

كيفاش بش نحكيلها الغلبة؟

كيفاش بنيّة عمرها 3 سنين

بش تفهم مرار عشيّة كيف مشيت يا عنيّا؟

بش تفهم كيفاش المرض كلاك؟

بعّدني عليك و نساك؟

بش تفهم كيفاش الغصّة مازالت؟

و في قلبي دوّامة

و كلّ يوم نمشي للجبّانة

و نحطّلك فِلّة بش تعطّر روحك من كلّ علّة

حبّي ليك شيء عجيب

حبّي ليك طلع حيّ و عمرو ما مات

حبّي ليك نوصفو بالمياه و الأنهار

تي شويّا عليك لواش الخّنار

كلّ ليلة نهلوس

نحكي معاك و خيالك يتزلوس

كلّ ليلة نشكيلك

تتفكرّ كيف كنّا نتعاركو؟

و كلّ واحد فينا يغضب في تركينة؟

و بعد ربس ساعة نرجعو للضّحكة البنينة

تذكّر بلاد النّجوم إلّي طلّعناها؟

كلّ يوم نحسبو في نجوم ما بانو عليها

أنا ليو ما بقالي كان تذكار

و تحفونتنا تكبر و تجنّح في الأوكار

و أنا

أنا نجّم نحكي

الدّموع تسبقني و تجري

في الظّلمة قاعد نستنّا

كيفاش بش تكمل حياتي

 و أنا حزين

مع الأيّام وجهي يصفار

و حبّك فيّا شاعل نار

الطّريق للجبّانة أولى بيّا

على الأقّل نتلاقى أنا ويّاك

و نكملّو الثنيّة

وتحفونتنا تكبر و تطير

أمّا أنا هاني نربّي في فِلّتي

و كلّ يوم الجبّانة على ذمّتي

مهدود الحيل نبكي و نسير

شارع باريس

على نور في ظلمة

على كلام في طرشة

على سنين بلا رحمة

على يوم ما يوفاش

على ناس ما تبراش

علّي تعب و ما جناش

علّي قرا و نسا

علّي كلا و ما شبعش

علّي دارت بيه الدّنيا و مازال ما فاقش

يحكيو في بلاد 

على طفلة هزّها الواد

جيعانة

 و بادت في اللّيل عطشانة

علينا موش عليكم و هذي الدّنيا بيكم؟

علّي عبّا و زاد  عبّا و قرام لله ماشافتّو كان النّهبة

علّي ضيّع طريقو و نساووه

عليها هكالطّفلة يتيمة و مطيّشة

الغّصة في بلحوحها و هي تلاجي

سنين الغلبة مازالت

و هي من الصّغر تكلت و تساعد

كلّ يوم في نفس آلبلاصة

شارع باريس وين الفيس

التّبزنيس و التّنرفيز

الكلّو على بعضو

الماشي و الجاي و هي تدعي

إلّي يحنّ عليها يعطيها حويجة

و إلّي ناسيها طول عمرو يقعد مجافيها 

العيشة كلبة و زادة كِلبتْ عليها 

لا حنّت و لا زهات

ديما ما تخلط كان عل نصّ خبزة

هذاكا فين وصلت في الحياة إلّي ردّتها نبزة

تطلع 

تهبط 

تزرقن

البيبان مسكرّة و العيون مغّمضة

بشكون بش تشكي؟

بلّي لوّحها و مشا؟

بلّي طروشتها و بكات؟

بلّي ديما برجو بالسّكات؟

شارع باريس 

و الموزيكا بحذاها

واحد من جماعة  الكيّة يتعدّا ساعات يزّهيها

على مقام نهاوند٬

بياتي و النّهار يحلى في لحظاتِ

ترجع شويّا الضّحكة في وجّها 

و تغنّي معاه الجويني من قلبها

رحلة ما وفات

و فيها كلّ الوصفات

وكلّ نهار و قسمو

 لوين بش توصل من أصلو؟

آه يا بلادي راني عليك إنّادي

إرفق بحالي و حال كلّ زوّالي

راهو الفقر موش عيب 

و الكبر موش عيب

ما العيب كان العيب

شارع باريس

و كلّ يوم رنّة جديدة 

نهارات الشّمس تبان 

و نهارات ظلّها متخبّي واء الأوهام

نهارات الوردة الحمراء إطّل عليّا من فمّا 

و نهارات يولّي الياسمين ما عندو معنى

شارع باريس و أنا و جرودي نغيص