couvre feu

شوارع كحلة
وحيوط مفرّقة
2 متاع الصّباح
سكات
والكلام ما ينطاق
بقايا رماد
وهواه ما يذبال
كيما كلّ ليلة
تتهدّ التّبسيمة
وأنا غارقة في الأفكار
في السّوايع و في الأعمار
نخمّم
نستنّى
آش باش يصير
زعمة نطير؟
ولاّ تبقى الوجيعة
عاملة فيك وفينا
كوفرو فو هبّ علينا
نفوس هايجة
خايخة وعندها ما تقول
سكتّوها في الظّلام
حصّلوها كالضّبع
ونساوها في العدم
نخمّم في كلّ واحد فينا
في العيشة الكلبة
إلّي ماناش حاملينها ترجع
قاعدة في البركون
يدّي على خدّي
وأنا نلاجي
على الهمسة نشوف
في ضوّ مشعول قدّامي
ولد الجيران
إلّي مقابلني
وليّد بلاش حكاية
عمري ما تعلّمت
نحكي مع البّراني
و هو 20 سنا عايش قدّامي
قاعد يتنّهد
على الحال المهموم
و السعد المكبوب
يسمع في أنور براهم
غنايتنا
قلبي ضحك
تبسّم ونطق
قلت زعمة منين يعرفها؟
يعسّ عليّا؟
يأمن بيّا؟
ولاّ القلب على القلب
في هواه مادبّ
ولاّ بالكشي في ليلة
و حتّيت سنفونيّة
كوفرو فو كواني
حتّى بش نتنفّس
ما لقيت ثنيّة
ونشوف الشّوارع كيف ماهي
بقايا خنقة
بالفلقة
تحصر البكاء في عنيّا
ونسيت إلّي كان
ولد الجيران سلّم عليّا
ما سمعتو و طفّيتو
نحسّ في نار لاهبة فيه
من سنين ساكنة فيه
عازف حزين
شاعر مقهور
ولقا فرصةزعمة نكلّمو؟
ولّ نبقى أنا و صاحبتي
الوحِدة إلّي ماكنتني
ماهي معذّبتني
وعمرها ما خانتني
عمرها ما نساتني
 و عمرها ما جرحتني
تدخل في القلب
بين الشّعرة و الفتيلة
ذهب
كوفرو فو والإلهام قاتلني
و ما عندي سرّ بش نبوحو
بقايا رماد
 دمّ يسكسك
والحالة تعبانة
ولد الجيران صابر عليّا
وعمرو ما قال كلام
كوفرو فو
العينين تتكلّم والفم بايت يتألّم
سكات
وأنور براهم مازال يعلّم
فنّ عظيم لمّ الشّمل بعد سنين
 كوفورو فو يا عنيّا
و غدوة ما تبطاش عليّا شويّا

Avenue Habib Bourguiba

Avenue Habib Bourguiba la NUit

سماء مسحبّة 

وشتاء تقطّر

قلت نمشي لشارع بورقيبة

بعدما روحت من الكليّة بدقيقة

هبطت

ديما وحيدة3

شهر بعد الثّورة العظمى

وأنا نستنّى في الّحظة الكبرى

من التّي جي آم على سقيّا

وأنا من عين لعين 

من وجه لوجه 

فرحانة و حزينة

الآفونو خالية 

الآفونو بباراجاتها حسّيتها عريانة

تحبّ تتدّفى بيكم 

تحبّ تتدّفى بينا

هذي بلاصتنا

هذي حريّتنا 

هذي بلادنا

هذي حنينتنا

وهذي ضحكتنا

قدّمت شويّا

الدّاخليّة

دنيا الخلا والقفار

والنّاس فرفر

كلّ واحد لاهي في شورو

وأنا قريب بش نبكي 

زدت شويّا،قهاوي 

تملا و تفرّغ

وقتها حسّيت بشويّا

 أمل 

بشويّة حريّة

ونشّم في ريحة ماهي طبيعيّة

ريحة جديدة

ريحة بنينة

ريحة تقيدي فيّا

ريحة إنسانيّة

ريحة واحد يتنّفس 

ريحة واحد يتنهّد

ريحة واحد ضايع

وجاتو دنيا جديدة

ريحة واحد ضيّع شبابو

وليوم يتذكّر

ويقول قدّاشني كنت في  عبوديّة

ضفرت الشّيب على صغر سنّي

وما فارقتني النّكبة حتّى في حلمتي

زعمة ليوم نعيش؟

زعمة ليوم ما نخافش؟

من الغول إلّي قدّدني

ومن الهبّة إلّي فرعستني

زعمة نقول تهنّيت؟

ومدّيت سويقاتي و تمدّيت؟

زعمة نقول بديت نددّش؟

ولّا نرجع بالتّوالي

ما لقيتش حتّى قوارص تفوّحني

 ولا قويلب صابون يفرهدني

ميسالش الصّبر راهو عجيب

يجي نهار ونولّي عبد كريم

التّيياترو

حضبة قدّامو محّومة

وناس تتناقش بالكلمة

وأنا نتبسّم

عباد ولّات تفضفض

تحكي 

تقول رايها وحدّ ما يسالها

خلّيها

 يزّيك ما سكّتها

ومن النّبوت لغّمتها

دنيا عجيبة

إدّور عالعبد في لحظة

كمّلت طريقي لبرشلونة

بش ناخو الكار

عباد في ميزيريا

 وعباد تخمّم

والله نحبّكم لله في سبيل الله

نحبّكم من كلّ بلاصة

ونحبّكم كيف ما نتوما

آلآافونو نتوما تحفّلوها

ونتوما إلّي تنوّروها

آلآافونو تستاهلكم

كلّ واحد فيكم

بتفذليكاتكم

وقعداتكم

وسهريياتكم

الآفونو ليك

الآفونو ليّا

 الآفونو تسهّل العيشة المسميّة

 PS:لآفونو: AVenue