- في باب بحر
- كلّ شيء تَعْملْ
- مرا تعدّات منّو كلّ يوم
- مرا عليها نور
- مطلّقة
- و قعدت بالصّغار معلّقة
- نوّارة عينيها
- و حتّى لوُ كان نهار
- تضوا في عينيها الدّنيا
- ما تخلّي حدّ يهزّهملها بالمرّة
- مرا و عليها الكلام
- تقاسي و فمّها مسكّر
- لا تباصي
- عينين النّاس دونيّة
- و عمرهم لا عاونوها
- حتّى بكليمة حلوانيّة
- في باب بنات تسكن
- دار بزوز بيوت
- فيها تحيا و تموت
- ربّي يرحم الجدود
- مرا و عمرها ما نسات
- هجّ راجلها
- و خلاّها في البلاد كيما يظهرها
- ظهرها تقوّس
- من هزّان دبّوزة الغاز
- الجهيّد على قدّو
- و الغصّة في قلبها تهدّو
- الصغار كبرو
- و مصروفهم زاد
- ماء ،ضو، آتود و هات من هاك اللاّوي
- منين بش تشّب؟
- منين بش تجيب الفلوس؟
- منين بش تعيش؟
- ألف مشكلة في مخّها
- و ما عندها كتف حنين يمسحلها خدّها
- مرا و يا حسرة على الأيّام
- كيف كانت تكحلّ و تسوّك
- لشكُون توّا بش تزيّن؟
- هجّ الرّاجل و ما ولّى
- و في الخلا ما خلاّ
- لاجواب و لا تليفون
- لا تعرف عليه حيّ و لا مقتول
- مشا في نهار و ليلة
- قامت في الصّباح
- تلقا الدّنيا حليلة
- مرا و عندها كارها
- و كان واحد يقول فيها كلمة
- ترجّع عليه بالعشرة
- تنهيد وراء تنهيدة
- موش من توّا
- هذي من مديدة
- تقول ديما
- الكلام الفارغ ما يسواش
- و كلام السّنين ما نسمعهاش
- زعمة يا لعمى؟
- زعمة تتحّل في وجهي البيبان؟
- و ناكل الخبزة في هالأيّام؟
- تي هاو حتّى كيلو لحم ما خلط عليه
- و حتّى كي نشريه نوّدو و لصغيّراتي
- هوما أولى بيه
- راس الشّهر الكراء
- و الملاّك يجيء و ما يجيب معاه كان البلاء
- تقلّو أصبر عليّا عيّش خويا
- راني في ذهباتي مرهونة
- مسكين يهبّط راسو
- و يرّوح ساكت
- لابد و يدلوح في بالو
- العيد قرب و فريب الحفصيّة بحذاها
- و كالعادة ما عندها شكون يكسيها
- تبدا متلحّفة في سفساري
- و لامّة شعرها ديما لتالي
- آه يا دنيا
- بربّي على شكون بش ترضى؟
- تتشّمت فيّا هكّا
- راني مرا وليّة
- و عمري ما جريت وراء الهديّة
- بعرق جبيني نواسي حيلي
- ما عيني في حدّ يهزّ معايا وضنين القفّة
- سنين و أنا نكلت كالدّغفة
- و زادت عليّا هالخرفة
- و يا إلّي تحبّ تكحّل بابورك راهو زفّر
- مرا وحدانيّة
- ماعينها عقاب عمرها في زرزوميّة
- مرا و ماعينها في كلام
- لا سياسة و لا أوهام
- تعيش كلّ نهار و قسمو
- و لا تجبد عرض فلان و لا أصلو
- مرا تعوم في القهر
- ترقد و تقوم على العوج
- غارقة في هالبحر
- تقول ديما دارنا تستر عارنا
- أمّا العار ما عملتوش
- الفقر ولاّ عار في هالأيّام
- يا والله أحوال
- مرا و تتعدّ الأيّام
- و هي من هالخربة ماشافت أعلام
- مرا و عليها الكلام
- مرا و النّساء إلّي كيفها قلال
samedi 20 août 2011
Femme de mon chagrin
Inscription à :
Publier les commentaires (Atom)
Aucun commentaire:
Enregistrer un commentaire